Titus porfin a gana su promé wega den e kampionato nobo di vòlibòl. E tim ayera, djarason 5 di dezèmber 2018, a superá e aktual supkampion di Kòrsou Xaverianen ku skor di 3-2. Den e otro enkuentro di mesun klase superior maskulino Watakeli a sigui su racha viktorioso ganando di Stakamahakchi den tres sèt.
E kampionato organisá pa Federashon Vòlibòl di Kòrsou (Fevoko) a sigui ayera djarason ku e último dos weganan di promé buelta den klase superior maskulino. E kompetensia dediká na Dito Ravenstein ta tuma lugá den sala Errol Rooi di Sentro Deportivo Kòrsou (SDK) na Brievengat.
Titus ku a promové pa klase superior e aña’ki, ayera porfin a haña number di kas sorprendiendo Xaverianen. Despues di a pèrdè e promé sèt ku skor di 25-17, e tim debutante a empatá i despues bai dilanti (2-0) ganando e di dos i di tres sèt ku respektivamente 25-22 i 25-23.
Xaverianen ku ta aktual supkampion a rekuperá den di kuater sèt ganando esaki ku skor di 25-14. Ku e wega empatá 2-2 a pasa pa hunga e di sinku sèt ku Titus despues di un lucha tenás a gana ku 15-13 i asina selebrá su promé triunfo dje kampionato den divishon máksimo.
Den e otro wega den klase superior maskulino Waakeli a sigui gana. E tim a superá Stakamahakchi ku skor di 3-0. E parsialnan ta 25-17, 25-22 i 25-19.
E kampionato ta sigui djadumingu awor den sala Errol Rooi di SDK.