Kasi 100 hundadó senior di tènis di mesa for di Aruba, Boneiru, Kòrsou, Hulanda, Mexico, Chili, Peru, Colombia i Venezuela ta kompetí e wikènt aki den un kompetensia internashonal di masters. E torneo ta organisá pa Federashon di Tènis di Mesa Kòrsou (FTMK).
E torneo internashonal di masters ta den kuadro dje selebrashon di 40 aña di aniversario di e federashon su sentro rekreativo Irene Moreno na Muizenberg. Promé ku e torneo kuminsá awe’tardi djabièrnè 11 di oktober, tabatin ayera un enkuentro interinsular den e sentro aki, ku a bai entre selekshon di tenistanan di mesa for di Aruba i Kòrsou.
E kompetensia internashonal di tenis di mesa master ta tuma lugá den sala deportivo Errol Rooi di Sentro Deportivo Kòrsou (SDK) na Brievengat. Ta hunga den e siguiente kategorianan: kategoria habrí, 50-plus, 70-plus i Damas. E kompetensia ta ranka Sali awe’tardi 5’or. E torneo ta sigui mañan djasabra mainta for di 9’or, miéntras ku e finalnan ta djadumingu mainta 10’or.
E premionan den e torneo ta konsistí di plaka. E ganadó den kategoria habrí ta bai kas ku 500 dòler i esun ku sali supkampion ta haña 250 dòler. Den e kategorianan 50-plus i 70-plus e kampionnan ta gana 250 dòler, miéntras ku e hungadó ku sali di dos ta haña 125 dòler. E entrada ta gratis.Den e simannan promé ku e torneo internashonal di tenis di mesa pa masters, federashon a organisá tambe un charla i un seshon di entrenamentu ku e lendario strea di tenis di mesa di Hulanda, Bettine Vriesekoop. Despues e entrenador di tenis di mesa di Venezuela, Ruddy Raga, tambe tabatin un entrenamentu.
Riba e foto por mira e legendario hungadó di tènis di mesa Hulandes Bettine Vriesekoop meimei di vários hóben ku a sigui un seshon di entrenamentu serka dje resientemente.
