Xaverianen i Jumping Jewels a trit e publiko riba un tremendo show den kontinuashon dje kampionato di vòlibòl lokal. E wega den klase femenino superior a sirbi tambe komo antesala pa apartura di vòlibòl hubenil ku ta ranka sali e wikènt aki.
E kompetensia lokal di vòlibòl a kontinuá den Sala Errol Rooi di Sentro Deportivo Kòrsou (SDK) ku un solo wega den klase femenino superior di Federashon Vòlibòl Kòrsou (Fevoko).
Jumping Jewels i Xaverianen a topa otro. E wega aki a bira finalmente un tremendo espektakulo, kaminda niun di dos tim kier a baha kabes pa otro. Pues e enkuentro tabata durú bringá pa tur dos banda ku rèlinan largu, kaminda e defensa di e timnan a funshoná zeta.
Jumpimg Jewels a kue e promé sèt ganando esaki ku skor di 25-17, pero Xaverianen ta nivelá esaki mesora poniendo sèt # 2 riba su nòmber ku skor di 25-21. Den sèt #3 coach Rugenne a papia fuerte ku su hungadornan i a duna ordu pa sera porta i Jumping Jewels ta kue e set aki ku parsial 25-16 .
Den di kuater sèt Xaverianan a bolbe sorprendé Jumping Jewels ganando ku skor di 25-14 pa asina forsa e set final. Den e sèt desisivo aki kos a bira kayente ya ku niun di dos ekipo no kier a baha kabes pa otro. E tenshon i emoshon a subi formalmete den e set final aki.
Raimy Janga ku ta Head Coach di Xaverianen a duna su harmadó di wega Mathilde van Grieken instrukshon kla pa ken e mester hisa e bala. Esaki a duna resultado i Xaverianen den un forma super sensashonal a gana e set final ku skor minimo 15-13 i laga jumping Jewels den tereno den un tremendo partido. E kampionato ta kontinua dialuna awor ku dos partido den klase A entre Shuatanari i Watakeli i tambe Xaverianen kontra Stakamahakchi.
Den wikènt, esta djasabra, tin sinembargo apertura dje kampionato hubenil. Esaki ta tuma lugá den Sala Don Bosco na Buena Vista i lo ta solamente pa hungadónan maskulino i femenino di 14 aña i mas hoben, esta U14.
E timnan ku ta partisipá ta Hurricane, Jumping Jewels, Stakamahakchi, Shautanari, Xaverianen i Watakeli.
