Despues ku Sta Rosa Angels Vanddis a sigurá anteriormente su klasifikashon, den wikènt tras di lomba Pichingolo Kia/Nissan i Fighting Team tambe a klasifiká pa hunga serinan prefinal. Souax Gill’sport i Eagles Softex ta luchando pa bira e di kuater finalista den divishon superior di sòfbòl femenino.
Curaçaose Softball Bond (CSB) a kontinuá e kampionato di sòfbòl femenino den dòbel A den wikènt ku un total di 4 wega. Esaki ta den rekta final dje kompetensia aki ku yama Liga CSB-MCB.
Sta Rosa Angels ku tabata e promé tim ku a sigurá su klasifikashon pa ‘playoff’, a gana su di 15 wega. E kampion di Kòrsou a triunfá ku skor di 5-3 riba Souax Gill’sport. Picher ganadó tabata Janiska Franklin, miéntras ku Stephanie Carolus, Lyuska van het Kruys u Gesilene Royer kada un a bati 1 hit den 1 turno.
Pichingolo ku tras di lansamentunan di e picher Hulandes Shana te Vrede a gana resientemente di Sta Rosa Angels, den wikènt a gana ku skor grandi di Nos Tei Curaçao Office Supply: 9-0. Arnalda Margarita a tèrminá komo picher ganadó. Stephany Pasial tabata mihó batiadó ku 3 hit den 4 turno.
Mas aleu Fighting Team tambe a gana di Souax Gill’sport: 4-0. Picher Lee-Ann Craanberg a gana e wega. Sharon-Rose de Lanooi a bati 1 hit den 1 turno i a empuhá dos kareda.
Finalmente Eagles Softex a logra un viktoria importante den su lucha pa klasifikashon, ora ku e tim a gana ku skor di 10-0 di Nos Tei Curaçao Office Supply. Picher ganadó tabata Giogianys Camacho, miéntras ku Loeyendra Valentijn tabata perfekto den kaha di bateo: 3 hit den 3 turno.
E tim di Sta Rosa Angels ta sigui komodo na e promé lugá den Liga CSB-MCB ku 15 viktoria i 2 derota. Pichingolo ta okupá di dos puesto ku 11 wega ganá i 6 pèrdí. Fighting Team ta sigui na di tres lugá ku 10 triunfo i tambe 6 derota. Na e di kuater puesto tin Souax Gill’sport ku 7 viktoria i 10 wega pèrdí, miéntras ku Eagles Softex ta sigui na di sinku lugá ku 6 wega ganá i tambe 10 derota.
E kampionato ta kontinuá djarason awor ku dos wega den Buena Vista Ballpark.
