E selekshonnan di bèisbol di Liga Pariba i Liga Pabou a kuminsá e kompetensia di Karibe di Little League ayera djaluna 15 di yuni ganando nan wega inisial. Nan a derotá e timnan di Boneiru i Sint Maarten respektivamente ku skornan di 3-2 i 12-1. E tim di Repúblika Dominikano tambe a gana su promé wega kontra e Saint Thomas Virgin Island Merikano ku skor di 17 pa 0.
Kòrsou komo pais anfitrión ta partisipá ku dos tim den e kampionato regional pa hungadónan di beisbòl di 9 pa 12 aña. E kompetensia di Little League akí ta tuma lugá e siman aki na stadion di Post 6 na Rio Canario.
Liga Pariba tabatin ku tòg luchá duru den su promé wega kontra dje tim di Boneiru. Ku 1 kareda den di tres i kuater inen, e kampion di Kòrsou a bai dilanti 2 pa 0. Boneiru a skor 1 kareda den di sinku turno na bate. Después di esaki, tur dos tim a skor un kareda mas i a fihá e skor final na 3-2 pa Liga Pariba.
Pitcher Aldair Ansano a gana e wega. Den 5 inen el a permití 2 hit i 2 kareda, miéntras ku ela ponchá 5 batiadó. Den e di seis inen ela traha lugá pa Archen Silva, ku a ponchá e tres batiadónan ku a bin bati. Presisamente Ansano (dos hit den dos turno) i Silva (un hit den un turno) tabatin e mihó batiadónan, mientras ku Gianirro Martina tambe a sobresalí ku un homerun den un turno na bate.
E batadónan di Liga Pabou tabatin un fiesta di bateo kontra e tim di Sint Maarten. Nan a bati 14 hit i a skor 12 kareda. Jose Lopez Sanchez tabatin 2 hit den dos turno na bate (2-2), mientras ku Jayven Godfried i Reychel Cicilia kada un tabatin 1 hit den un turno na bate (1-1).
E selekshon di Repúblika Dominikano tambe a gana ku skor grandi dje tim US Virgin Island: 17-0. Ricardo Martin de Leon Castro i Yan Carlos Santana Oguisten ku nan hitnan a empuhá kada un 4 kareda, ku pues ta kasi mitar dje produktividat di kareda dominikano. Porsierto ku Oguisten tabatin tambe un homerun.
