Rashid Rosalina di Kòrsou a bira e promé ganadó dje ruta nobo di Guardian Group Run 2017, antes konosí komo Kareda di Fatum. Esaki ta di 34 edishon dje kareda aki. Aracely Parra-Medina di Aruba a gana e kompetensia femenino.
Segun kalkulo un kantidat di entre 6500 pa 7000 persona a tuma parti e aña’ki na Guardian Group Walk and Run. Tabatin partisipantenan di Aruba, Bonèiru, Hulanda i Kòrsou. Tabatin 350 boluntario den e evento deportivo rekreativo aki.
Guardian Group Walk and Run tabatin di mes komo patrosinadó prinsipal Guardian Group i tambe ko-patrosinadónan EWT, Coca-Cola, Vitamalt, Selikor, Kortijn IJs, Total Services i Greyan Films. E kareda i kaminata e keda organisá manera ta kustumber dor di Road Runners Club Kòrsou (RRCK).
E aña aki e ruta di Guardian Group Walk and Run a kambia. Ela kuminsá na ofisina di e kompania di seguro na Cas Coraweg 2 pasa via di Schottegatweg Oost, subi Dokweg, pasa Emancipatie Boulevard i Rijkseenheid Boulevard, Schottegatweg Zuid, Presidente Romulo Betancourt Boulevard, subi Koningin Julianabrug, pasa den Arubaweg, Pater Euwensweg, Weg naar Welgelegen, John F Kennedy Boulevard, Piscaderaweg i finalisá na Parasasa Beach.
Rashid Rosalina di Kòrsou a gana e kareda di Guardian Group den kategoria maskulino. Ela registrá un tempu di 37 minüt i 27 sekònde. Esaki ta sinembargo 3 minüt mas tantu ku e ganadó di aña pasá Merwin Dollison di Kòrsou ku a registrá 34 minüt i 37 sekònde.
Na di dos i di tres lugá tras di Rashid Rosalina a finalisá e aña aki koredonan di Aruba: Jürgen Geerman i Jonathan Busby. Geerman a klòk un tempu di 38 minüt i 23 sekònde, miéntras ku Busby a registrá 38 minüt i 53 sekònde.
Den kategoria femenino Aracely Parra-Medina di Aruba a gana e kareda di Guardian Group den un tempu di 46 minüt i 3 sekònde. Porsierto ku Marlies Kort di Kòrsou aña pasá a gana e kareda den un tempu impreshonante di 38 minüt i 48 sekonde. Pues e tabata 18 minüt mas lihé.
Marleen Bolhuis di Kòrsou a drenta komo number 2 tras dje ganadó Aracely Parra- Medina. Ela hasi esaki den un tempu di 50 minüt i 10 sekònde, miéntras e di tres mihó koredó tabata Ruthlyn Web di Aruba den un tempu di 50 minüt i 15 sekònde.
Foto’s: Jacinto de Jesus