Curaçao All Stars a bini di atras pa gana ku skor pèrtá di Rock City Hoops i asina mantené su invikto den di 10 edishon di CuraSur International Masters Basketball Tournament. Faverey Boys tambe a mantené su invikto ganando fasil di Team Bordeaux.
Despues di un dia liber djarason, e di 10 edishon di CuraSur International Masters Basketball Tournament a kontinuá ayera’nochi -djaweps 26 di oktober 2017- den sala di deporte Errol Rooi di Sentro Deportivo Kòrsou (SDK) na Brievengat.
Curacao Masters Tournament Foundation (CMTF) ta organisá CuraSur International Masters Basketball Tournament. E kompetensia ta konta ku patrosinio prinsipal di: Curacao Tourism Board (CTB), Massive Productions i De Ron Machine Shop.
E paisnan ku a inskribí pa kompetí na e di 10 edishon di CuraSur International Masters Basketball Tournament ta: Merka, Puerto Rico, Sürnam, Hulanda, St. Maarten i Guyana. Sinembargo St. Maarten i Puerto Rico a kanselá nan partisipashon pa motibu di pasashi di Irma i Maria riba e islanan aki.
Riba e di 4 dia di kompetensia Faverey Boys a gana ku relativo fasilidat di Team Bordeaux: 66-30. Esaki tabata e promé enkuentro den e torneo ku un tim ta bula 60 punto. E hungadónan ku a skor mas tantu punto tabata Swight Berkeel i Sergio de Jong, tur dos ku 11 punto.
Den e di dos wega di anochi tabata parse ku Curaçao All Stars tabata bai sufri nan promé derota. E tim tabata dado momento 14 punto atras, pero a logra di empatá e partido i despues gana ku 53-48 di Rock City Hoops.
Faverey Boys i Curaçao All Stars ta invikto den 3 wega i awe’nochi, djabièrnè 27 di oktober. E ganadó ta kampion dje di 10 edishon di CuraSur International Masters Basketball Tournament.