Warwarú a titulá kampion klase A maskulino i ta promové pa divishon superior di Federashon Vòlibòl Kòrsou (Fevoko). E tim sinembargo tabatin ku lucha duru awe, djarason 3 di mart 2019, kontra Watakeli pa por a konkistá e titulo: 3-2.
E kampionato di Fevoko ku ta dediká na Dito Ravenstein a sigui den sala Errol Rooi di Sentro Deportivo Kòrsou (SDK) na Brievengat. Un bon públiko tabata testigu dje bataya kampal entre Warwarú i Watakeli.
Warwarú a bai 2-0 dilanti den e promé sèt, pero Watakeli a hasi e wega pareu (2-2) i asta bai 5-2. E timnan no a laga otro kue muchu punto di distansia for di otro. Den e fase final dje promé sèt aki asta e skor tabata kana pareu, pero finalmente tabata Watakeli ku sorprendentemente a gana e dos puntonan final: 25-23.
Warwarú ku no sa tin kustumber di pèrdè e promé sèt, a rekuperá den e di dos ganando esaki ku parsial di 25-19. E adrenalina dje hungadónan di Warwarú a sigui haltu i asina nan a gana e di tres sèt tambe (25-23) pa asina pika dilanti 2-1. Tin ku remarká ku den e sèt aki hopi dje servisionan di tur dos tim tabata demasiado largu, esta pafó di kancha.
Den di kuater sèt tabata Watakeli ku tabatin mihó wega i a logra empatá e wega na 2-2, ganando e sèt aki ku parsial di 25-17. Ku e triunfo aki e tim a forsa e di sinku sèt. Warwarú sinembargo a rekuperá i gana e sèt desisivo aki ku parsial di 15-11.
Despues dje enkuentro i selebrashon riba kancha i den tribuna, a sigui mesora ku entrega di premio. Fevoko ta wanta e kompetensia pa un siman i ta kontinuá riba dia 14 di aprel ku semi final den klase A femenino i tambe e weganan preliminar ku falta ainda den divishon superior femenino i maskulino.
