Watakeli ta gana su di dos wega den klase superior maskulino di vòlibòl, propinando Stakamahachi un derota fulminante. Den klase superior femenino tabata presisamente Stakamahachi ku ta dal Watakeli duru.
Federashon Vòlibòl di Kòrsou (Fevoko) a kontinuá awe, djadumingu 26 di novèmber 2017, ku su kampionato regular. Esaki a tuma lugá den sala Errol Rooi di Sentro Deportivo Kòrsou (SDK) na Brievengat.
Despues di a gana Xaverianen di forma dramátiko den nan promé kompromiso siman pasá (3-2), Watakeli a registrá awe su di dos triunfo den klase superior maskulino. E tim a gana ku 3-0 di Stakamahachi, aunke ku e ekipo pèrdèdó a duna tur ku tin. E skornan: 25-19, 25-22 i 29-27.
Den klase superior femenino tabata Stakamahachi ku a logra su di dos viktoria, superando Watakeli ku skor di 3-0. E sètnan tabata 25-16, 25-12 i 25-18. Den su promé kompromiso siman pasá Staka a gana di Shuatanari ku skor di 3-1.
Mas aleu Hurricane a logra su promé viktoria di temporada den klase superior femenino, ganando ku 3-0 di Green Jewels: 25-12, 25-8 i 25-18.
Den klase superior maskulino Xaverianen tambe a logra su promé triunfo dje kampionato. Esaki tabata riba Green Tigers: 3-0. E sètnan tabata: 25-18, 25-21 i 25-23.
