Watakeli a kontinuá ku su racha viktorioso den divishon máksimo maskulino di Federashon Vòlibòl Kòrsou (Fevoko). E tim kampion di Kòrsou den un bon wega ayera, djadumingu 27 di yanüari 2019, a superá Stakamahakchi ku skor di 3-1.
E kampionato lokal di vòlibòl ku ta dediká na Dito Ravenstein, a kontinuá ayera ku vários enkuentro den sala Errol Rooi di Sentro Deportivo Kòrsou (SDK) na Brievengat. Tabatin tres enkuentro den klase A i dos wega den divishon máksimo.
Den un tremendo konfrontashon Watakeli a mantené su posishon na promé lugá den klase superior maskulino, ora ela gana atrobe di Stakamahakchi. E enkuentro tabata hopi emoshonante ku e tim kampion ganando e promé sèt ku 25-18. Stakamahakchi sinembargo a empatá e skor 1-1 ku triunfo di 25-23 den di dos sèt. Watakeli a rekuperá den di tres sèt ganando ku mesun skor 25-23 pa finalmente gana tambe e di kuater sèt ku 25-19.
Den e otro wega den divishon máksimo maskulino Xaverianen a gana den tres sèt di Titus. E parsialnan tabata: 25-18, 25-18 i 25-16.
Den klase A femenino Shuatanari a triunfá ku 2-1 riba Watakeli: 25-19, 23-25 i 17-15. Den mesun klas i kategoria Hurricane a superá Xaverianen 2-0: 25-13 i 25-11. Stakamahakchi den klase A maskulino a lucha duru pa por gana di Titus ku skor di 2-1: 24-26, 25-22 i 16-14.
E kampionato di vòlibòl ta sigui awenochi djaluna ku dos enkuentro den klase A: Shuatanari vs Xaverianen i Stakamahakchi vs Hurricane. Esaki nan ta den kategoria femenino.