E tim maskulino di Watakeli a gana pa di 7 aña konsekutivo e titulo kampionil den e kampionato di vòlibòl di Kòrsou. Stakamahakchi a perde den e kuater wega den final ku skor di 3-1. A kanselá momentaniamente e fiesta di kampion di vòlibolistanan femenino di Shuatanari, pasobra Stakamahakchi a protestá e resultado na último momentu.
Un bon públiko a bishitá sala di deporte Errol Rooi di Sentro Deportivo Kòrsou (SDK) pa por disfrutá di dos wega di vòlibòl eksitante den final di divishon superior. Den tantu maskulno komo femenino di Federashon Vòlibòl Kòrsou (Fevoko) tabatin e di 4 wega final.
Watakeli a kuminsá e wega brabu ganando e promé set i demonstrando ku e tim ke prolongá su titulo kampionil. Stakamahakchi a empatá e skor sinembargo na 1-1, ganando e di dos sèt. Watakeli a bin fuerte bèk den e wega ganando tantu e di tres komo di kuater set: 3-1.
Ku e resultado ei Watakeli a bira kampion di Kòrsou pa di 7 aña konsekutivo. Esaki ta tambe e di 14 titulo dje organisashon akí.
E tim femenino di Stakamahakchi a parse di ta bai gana fasilmente e di 4 wega di final ora ku ela gana e dos promé setnan kontra di Shuatanari. Pues e tim tabatin ku gana 1 sèt mas só pa empatá e final na 2-2 i asina tambe forsa un di 5 i alabes wega desisivo den final.
Sinembargo e vòlibolistanan di Shuatanari a demostrá gran determinashon i konsentrashon ganando e di tres i kuater sèt. Ku e skor empatá na 2-2, a pasa pa hunga e di 5 i alabes último sèt. Esaki tambe Shuatanari a gana: 3-2. E resultado akí a nifiká e di dos titulo di kampion konsekutivo pa e tim i tambe e 17 na total.
E fiesta di kampion di Shuatanari riba kancha i dje fanatikonan den tribuna, sinembargo a keda interumpí. Esaki tabata ora ku direkshon dje kampionato pa Fevko a anunsiá via dje sistema di zonido den sala di deporte di SDK, ku e tim Stakamahakchi a entregá un protesta.
E komishon di reklamo dje federashon di vòlibòl ta bai atende e protesta akí. Den kurso dje siman akí mes ta anunsiá e resultado di esaki. E posibilidadnan ta ku e protesta por keda rechasá i pues Shuatanari tòg ta kampion, òf sí e protesta prosperá tin ku hunga e wega podise di nobo, òf por duna Stakamahakchi ganá i e ora ei tin ku hunga un di 5 i alabes último wega pa disidi kua tim ta kampion
![](https://storage.googleapis.com/sportcwmedia/2024/06/2764f534-3-682x1024.jpg)
![](https://storage.googleapis.com/sportcwmedia/2024/06/c3e2539b-5-1024x682.jpg)
![](https://storage.googleapis.com/sportcwmedia/2024/06/52fb6ace-6-1024x682.jpg)
![](https://storage.googleapis.com/sportcwmedia/2024/06/83c0a6ff-7-1024x682.jpg)
![](https://storage.googleapis.com/sportcwmedia/2024/06/b36ee590-124a2148-1024x682.jpg)
![](https://storage.googleapis.com/sportcwmedia/2024/06/63a2ca0a-groep-1024x628.jpg)