Watakeli i Stakamahachi a kuminsá e kampionato lokal di vòlibòl riba bon pia. E timnan aki a gana nan promé weganan den tantu klase superior femenino komo maskulino.
Federashon Vòlibòl di Kòrsou (FeVoKo) ta organisá e kampionato den sala deportivo Errol Rooi di Sentro Deportivo Kòrsou (SDK) na Brievengat. E kompetensia a ranka sali den wikènt tras di lomba ku 4 enkuentro.
E promé wega den klase superior femenino a bai entre Watakeli i Hurricane, ku Watakeli ganando e enkuentro ku 3-0. E timnan a batayá fuerte den promé sèt: 25-23. Despues Watakeli a dominá kompletu ganando e sigieunte dos sètnan ku 25-15 i 25-10.
Den e di dos enkuentro di klase superior femenino Shuatanari i Stakamahachi a topa ku otro. Tabata Stakamahachi enkabesá pa Christine Anthony ku a gana e klásiko aki: 3-1. Despues di a pèrdè e promé sèt ku 25-27, Stakamahachi ta bin brabu den e di dos sèt pa gana esaki 25-20 i tambe e sobrá dos sètnan: 25-21 i 25-19.
Den klase superior maskulino e promé wega a bai entre Stakamahachi i Green Tigers. E timnan a duna un tremendo espektákulo ku a tèrminá den un viktoria di 3-2 pa Stakamahachi. Despues di a pèrdè e promé sèt ku 21-25, Green Tigers ta gana e di dos i di tres sèt ku 25-18 i 25-9 i asina tabata falta un sèt mas pa gana e wega.
Sinembargo Stakamahachi a logra empatá e wega 2-2 ganando e di kuater sèt ku 25-16. Finalmente Stakamahachi a gana tambe e di sinku sèt ku 25-19 pa asina bai kas ku su promé triunfo.
E di dos wega den klase superior maskulino a bai entre Watakeli i Xaverianen, respektivamente e kampion i supkampion di Kòrsou. E enkuentro aki tambe tabata kandela. Xaverianen ta sali klayente ganando e promé i di dos sèt ku 25-22 i 27-25 i pues tabatin mester di gana un sèt mas pa sigurá e viktoria.
Watakeli sinembargo tabatin otro plan i ta logra empatá e wega 2-2 ganando e di dos i tres sèt ku 25-17 i 25-23. E kampionnan di Kòrsou su adrenalina a keda haltu i nan a gana e di sinku sèt tambe (15-10) i asina a registrá un tremendo ‘comeback’ pa bai kas ku nan promé viktoria dje kampionato.
