Xaverianen ayera a bolbe gana di Stakamahakchi i asina pasa pa final den divishon superior maskulino di Federashon Vòlibòl Kòrsou (Fevoko). Den kategoria femenino e tim di Shuatanari via di un triunfo riba Hurricane a sigurá su pase pa final.
Fevoko a sigui awe, djadumingu 28 di aprel 2019, ku su kompetensia lokal ku dos enkuentro den divishon máksimo. E weganan aki a hunga pareu den sala Errol Rooi di Sentro Deportivo Kòrsou (SDK) na Brievengat.
Den divishon superior maskulino Xaverianen i Stakamahakchi a sòru pa un bunita espektakulo. E timnan aki a hunga sinku sèt ku mayoria dje skornan hopi pèrtá.
Stakamahakchi a sali brabu i kue e promé sèt ku skor di 25-16. Xaverianen a empatá e wega ganando e di dos sèt ku skor di 25-23. Xaverianen a bolbe kue ventaha ora ela gana e di tres sèt: 26-24. Atrobe Stakamahakchi a tabla e wega ku triunfo di 25-23 den di kuater sèt. E di sinku sèt tambe a kana hopi pareu pero finalmente tabata Xaverianen ku a gana esaki ku skor di 15-12.
Ku su di dos viktoria den e semi final, Xaverianen a pasa pa final. Den e seri aki e ta topa ku Watakeli ku anteriormente a gana di Titus den semi final.
Den divishon superior femenino Shuatanari no a duna Hurricane niun chèns, apesar ku e tim aki a bende su kueru karisimo. Aunke ku Hurricane a pèrdè den tres sèt, den tur tres ela skor 20 of mas punto. E parsialnan na fabor di Shuatanari tabata 25-21, 25-20 i 25-22.
Via dje triunfo riba Hurricane, Shuatanari a pasa pa final. E tin ku hunga awor kontra di Stakamahakchi.
